سلو المولد المغربي معلك ومقوم | سفوف ديال زمان

حمّري جوج كيلو وربع ديال الدقيق فالكوكوط مع التحريك حتى ياخذ لون ذهبي متجانس. خليه يبرد وغربليه جوج حتى لثلاث مرات. الهدف هو الحصول على جوج كيلو تقريباً من الدقيق المحمر الصافي بلا كويرات.

غسلي الزنجلان ونقيه، ومن بعد حمّريه فالمقلاة وهو مازال فازك شوية. الرطوبة كتخلي الحبات تنتفخ وتجي مقرمشة. منين يبرد قسميه: نصف خليه صحيح ونصف اطحنيه ناعم.

خلي 250 غ من اللوز المقلي صحيح للتزيين. قسمي الباقي: جزء مهرمش وجزء اطحنيه فالروبو حتى يطلق الزيت ديالو. زيدي بالتدريج من نصف كأس حتى ثلاثة أرباع كأس من زيت قلي اللوز للحصول على أملو خفيف.

حمّري كيلو وربع كاوكاو بلدي فالفران، وخليه يبرد تماماً، ثم اطحنيه فالروبو حتى يولي أملو ويطلق الزيت. زيدي كأس ونصف من زيت قلي اللوز بالتدريج حتى يولي القوام خفيف وسهل الخلط.

ذوبي الزبدة الحيوانية وخليها تغلي بشوية حتى يتبخر الماء ويتفصل اللبن والرغوة. حيدي الرغوة وصفي المادة الدهنية الذهبية. هادي هي الزبدة نوازيط اللي كتقوي النكهة وكتساعد على التخزين.

فبانيو واسع ديري الدقيق المحمر، الزنجلان المطحون، إيلان، النافع، حبة حلاوة، القرفة، الملح، خليط المسكة الحرة، الكوزة المحكوكة وسكر كلاصي المغربل. خلطي ودلكي النواشف مزيان حتى يتوزعو بالتساوي.

خلطي ودلكي الدقيق والمنسمات والمواد المطحونة جيداً باليد قبل أي مكوّن مهرمش. هاد المرحلة كتوزع النكهة وكتوجد الدقيق باش يتلبس بأملو من بعد.

زيدي أملو اللوز وأملو الكاوكاو على الدقيق، وبدئي الدلك والترميل باليد حتى كل حبة دقيق تتلبس بالدهون الطبيعية ديال المكسرات.

زيدي 250 غ من الزبدة نوازيط بالتدريج، وواصلي الدلك. ماتحكميش على القوام من أول دقيقة؛ خاص المكونات تاخذ وقتها فالترميل.

من بعد ما يتلبس الدقيق مزيان، زيدي الزنجلان الصحيح واللوز المهرمش. خلطي بلطف باش يبقاو واضحين ومقرمشين وما يتحولوش لمسحوق.

زيدي 250 غ المتبقية من الزبدة نوازيط بالتدريج، ودلكي حتى يجي سلو مرمل ولكن معلك ومقوم ملي تجمعيه باليد.

غطي سلو وخليه ليلة كاملة. فالصباح غادي تكون الدهون تشربات ويبان القوام الحقيقي. إلا احتاج تصحيح، زيدي كمية صغيرة فقط من الزبدة نوازيط أو الزيت ودلكي.

قدمي سلو فقصعة تقليدية أو كبسيه وقطعيه مورسوات بريستيج، وزيني الوجه بحبات اللوز المقلي الصحيح.

خلطي اللوز الصحيح المتبقي مع سلو اللي بقى فالبانيو، ومن بعد حطيه فبواطة نظيفة وجافة ومحكمة الإغلاق بعيداً عن الحرارة والرطوبة.